Ostean, azaroko Osoko Bilkuran, kasualitatez edo kausalitatez berriro ere, erroldaren ustelkeria larriaz hitz egiten zuen mozioa aurkeztu zuten. Lehen mailako arazotzat aurkeztu zuten erroldaren ustelkeria, dirulaguntza lapurren sarrera atea bezala. Mozioa irakurtzen amaitzerakoan, badaezpada, arrazistak eta ustelak deitu gintuzten areto horretan geunden gainontzekoak, oraindik kritikarik egin ez genienean ere.
Arraroa egingo zaizue, baina amorrua baino gehiago, auzo lotsa sentitu nuen Osoko Bilkurako PPkoen diskurtsoa entzutean. Hain da begi-bistakoa Marotok behin mikrofono aurrean esan eta gainontzekoek nekatu arte errepikatzen ari diren estrategia! Pausoz pauso azaldutako estrategia bezala ere errepikatu daiteke:
1. Desbideratu ezazu ustelkeriaren mezua, oinarririk gabeko edozein mezu asmaturekin bada ere.
2. Legitimitatea kendu eta estigmatizatu itzazu, etorkinak, dirulaguntza jasotzaileak eta mikrofono aurrean agertu eta beraien buruak defendatzeko aukerarik izango ez duten gizarte sektore guztiak.
3. Sistema kritikatu, horren sortzaile eta gestore nagusietako batzuk zaretela eta, beraz, errudun nagusietako batzuk zaretela aipatu gabe.
4. Mezua lau haizetara zabaldu, batez ere egoera ekonomiko eta ondorioz pertsonal gogorrena duten emakume-gizonen artean, sare sozialak, egunkarietako azalak eta masiboak diren medio guztiak erabiliz.
Ez pertsonalki ez politikoki, minutu bat ere ez dut inbertituko estrategia nazkagarri hori elikatzen. Getxon behintzat, PP orain arte ez da erroldaren ustelkeriaz arduratu, nahiz eta ohiko salaketa izan den Neguriko etxeetan urte osoan herritik agertzen ez diren baina hauteskundeetan asteburu pasa datozen ehunaka lagun ditugula erroldatuta. Ez da arduratu ere Iberdrola edo bestelako diru pilatzaileek euren egoitza errolda aldatzen dutelako, zerga erraztasun handiagoak ematen dizkieten erkidego edo herrialdeetara eramateko. Are gutxiago arduratu dira Getxoko PPko 9 zinegotziak, alderdikideak dituztenak zein euren senar-emazteak, Suitzan edo Andorran erroldatzen ikusi dituztenean.
Badirudi larriki arduratzen dituena hilean 600 euroko dirulaguntzak jasotzen dituztenen ustelkeria dela, 600 milioi euro iruzurtu dituztenena alderdia uzteko beste arduratu ez dienean. Are gehiago, “behekoen” moralitateaz kezkatzen dira, diru publikoaz iruzurra egiteko duten errazkeriaz larritzen dira, egunkarietan egunero “goikoek” moral horren eredu direla irakurtzen ari garenean. Berriz ere, gezurraren eta beldurraren bitartez kontrolatu nahi dute herria, etorkinak, gazteak, Diru-sarrerak Bermatzeko Errentak (DBE) jasotzen dutenak eta sistemaren itzalpean daudenei legitimitatea kenduz euren salbaziorako.
Ez naiz izango ni ziurtatuko duenik jendea egongo ez denik gizarte dirulaguntzetan iruzurra egin ez duenik; ez naiz ni izango dugun sistema (dirulaguntzena zein sistema kapitalista bera) onena dela esaten duenik. Baina argi daukat, gure borroka ez dagoela sistema honetan bizirauteko bidezidorra bilatzen dutenen aurrean; sistema hori euren ustelkeriaren neurrira diseinatzen dutenen aurrean baizik.
Horregatik guztiagatik, erabaki dut artikulu hau idaztea getxoztar bizilagun maite; mesedez ez ezazu whatsapp-a birbidali (zure zergak Suitza eta Andorrarako hegazkina hartzen jarraitzea nahi ez baduzu behintzat).
Maitane Nerekan Umaran Getxoko zinegotziak atzo Getxoko EH Bildu koalizioaren blogean argitaratutako artikulua
[cc-by-sa Maitane Nerekan Umaran - Getxoko EH Bildu] Korrika egiteko gelditu ginela, lagun batek jasotako azken whatsapp-az hitz egin zidan. Espainiatik kanpo etorritako etorkinez hitz egiten zuen mezuak, jasotzen duten dirulaguntza ikaragarriez eta Galean txaletak erosten laguntzen dizkien lapurtutako milioiez. Dirulaguntza jasotzaileen ustelkeria datu “zientifikoekin” aztertzen zuen, udaletako memorietan agertzen ez diren baina askoren ahotan guztiz enpirikoak diren datuez. Kasualitatez edo kausalitatez, hurrengo astean Getxoko Alderdi Popularreko bozeramaleek gizarte laguntzen jasotzaileen datuak eskatu zituzten, eskariari gehituz "si no te importa me los desglosas por nacionalidades" desinteresatu bat. Testuinguruagatik ez genuen pentsatu euskaldun, katalan edo espainiar identitateari buruz ari zirenik oraingoan; "moroak", "matxupitxuak" edo "negritoak" ziren jakin nahi zutela pentsatu genuen aipatu Komisioan geunden kolore politiko ezberdinetako zinegotziok zein teknikariek. Argazkian, azken urteotan jendarte kolektiboek makina bat aldiz egin dute protesta Lanbidek Areetan duen bulegoan, besteak beste, laguntza sozialetan izandako murrizketengatik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun