Kalea itxuraldatzeko proiektua auzokoen eta auzoko jabeen erkidegoetako ordezkari guztiei iaz jakinarazi ziela esan du Udal Gobernuak. Horretarako, "partaidetza prozesu" batean "haien ekarpenak jaso" eta proiektua "berrikusi eta moldatu" dutela agindu dute udal agintariek. Emandako datuen arabera, aipatutako partaidetza prozesuan proiektuaren hasierako proposamena erakutsi zuten jendaurrean eta "300dik gora lagunek bisitatu zuten" erakusketa hura. Proiektua hobetzeko 50 bat iradokizun besterik ez zen jaso.
Imanol Landa alkatearen esanetan, “hiri atseginago eta irisgarriago bat sortzen jarraitu nahi da, bi alderdi horiek bizi-kalitatea hobetzen dutelako, batez ere toki horretako auzotarrena”. Joseba Arregi Hirigintza zinegotziak, berriz, zehaztu du jarduketa-eremuak 16.240 metro koadroko hedadura dauka. Berak emandako datuen arabera, "43 aparkaleku-plaza berri ipiniko dira". Horrela, egokitutako kale tartean 88 aparkaleku-plaza geratuko lirateke guztira erabiltzeko, horietako bi elbarrituentzat. Halaber, bidegorri tarteak lotuko dira.
Irisgarritasuna hobetuko dutelakoan, oinezkoen zebrabide garaiak ipiniko dituzte Bidebarri eta Elorri kaleen elkarguneetan eta kale tarte osoa asfaltatuko dute. Arregik aipatu duenez, “antolaketa berri honek Ollarretxetik Erredentore kalera zuzenean sartzea ahalbidetuko die ibilgailuei. Eta jarduketa horrek jarraipena izan beharko du datozen urteetan Salsiduko errotondatik Fadurakora arteko zatian, gaur egun Foru Aldundiaren bidea den horren ematea gauzatzen denean”.
"Hiri basoa"
Hirigintza zinegotziaren esanetan, “berdeguneak berriro diseinatuko dira 1.670 metro koadroko eremua okupatuz, guztira. Zuhaiztiei dagokienez, tamaina handiko 7 bere horretan utziko dira, egoera onean daudelako, eta beste 29 ale berri landatuko dituzte, Eta Erredentore aldean plazatxo berria egingo da, 1.710 metro koadroko, horietatik 570 berdegune izango direla”. Oinezkoen gune berri horretan zazpi banku eta lau aulki ipiniko dira, eta jarduketa-eremu guztian, paperontziak.
Oinezkoen gune osoa eta plazatxo berria lau metroko altuera izango duten 22 zutabe berrik argiztatuko dituzte, "energia eraginkortasun handiko argiekin". Baldosa ekologikoa deritzona ere erabiliko da.
Azkenik, euri- eta saneamendu-sareak bereiziko dituzte, inguruko baldintzak ere hobetuz.
Obren egikaritzak ibilgailu-zirkulazioko eta oinezkoentzako ibilbideetan aldaketak eragingo ditu. Halere, aldaketa horiek "behar den moduan" seinaleztatuko dira.
Herri lanak abiatu dituzte Algortako Ollarretxen kalean
2014ko abe. 6a, 03:10
Aste honetan hasi dira Ollarretxe kalea erabat aldatzeko lanak, Erredentorearen eta Salsidu etorbidearen artean. Getxoko Udalak zabaldu duenaren arabera, proiektuaren bidez "400 metroko luzera duen eremua hobeto banatu nahi" dute, "bere kalitatea eta baldintza urbanistikoak hobetuz". Imanol Landa alkateak berak ildo horretan esan duenez, "esparru hori hiri-ingurunean integratuago egongo da eta irisgarriagoa izango da, hesi arkitektonikoak kenduta. Errepide bat dena kale bihurtuko da. Horrez gainera, inguruko zirkulazioa ere lasaitu egingo da, pertsonei segurtasun handiagoa emango baitie, ibilgailuen zirkulaziotik babestuta. 1.000 metro koadroko gune zabal berria edukiko du, lorategi-zona, oinezkoen alderdia, hiritarren probetxurako”. Halaber, auzoko saneamendu, ur eta argiteria sareak zaharberrituko dituzte. Azkenik, arbola gehiago landatuko dituela agindu du Udalak.. Lanetarako 1,5 milioi euro inguru bideratu ditu Getxoko Udal Gobernuak eta obra amaitzeko epea bost hilabetekoa izango da. Argazkian, herri lanen irudi bat / © Getxoko Udala.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun