Pepe Rei izango da gaur Algortan

Ukberri 2014ko abenduaren 9a

Gaur, asteartea, abenduak 9, "Pepe Rei aurrera!" liburuaren aurkezpena egingo dute Algortako Eztabaida gune antiautoritarioan (Villamonte plaza, A4). Hitzordua 19:30ean jarri dute. Liburuaren hainbat egilez gain, ekitaldian ohorezko gonbidatua izango dute; Pepe Rei bera, antolatzaileek jakinarazi dutenez. 1988an "Egin" egunkarian hasi zen lanean kazetari galiziarra. Bertan hain ospetsu izan zen "ikerketa taldea" sortu zuen. Talde horren arrakasta ondorio larriak izan zituen kazetari honentzat, hiru aldiz espetxeratua izan baitzen. 1998an, Baltasor Garzon epaileak "Egin" itxi zuen eta Pepe Rei gerora "Gara" mantxeta berria izango zenaren alde lanean hasi zen. 2000. urtean "Ardi Beltza" aldizkaria sortu zuen, laster Baltasar Garzonek itxiko zuena. Espetxetik irten eta Ikerketa taldeko eta "Ardi Beltza"-ko hainbat kazetariek sortutako "Kale Gorria" aldizkarira batu zen, 2002ko abuztuan Donostiako ingurabidean Pepe Reik istripu larri bat izan zuenera arte. Ondorioz, kazetaritza mundua erabat utzi behar izan zuen. Argazkian, 2011ko irailaren 29an estreinatu zuten Eztabaida Gune Antiautoritarioaren Villamonte plazako lokala.

Jose Benigno Rey (Barbantes, Ourense, 1947ko apirilaren 13a), Pepe Rei bezala ezagunagoa, oso gaztetik aritu zen kazetaritzaren munduan, hasieran "El Pueblo Gallego" eta Huelvako "Odiel" egunkarietan.

1974an, "El caso Reace" liburua argitaratu zuen; bertan Redondela aferaren inguruko informazioa bildu zuen, errudunen izenak azalduz, tartean Nicolas Franco, diktadorearen anaia. Ondoren "Madrid" egunkarian hasi zen, frankistek hedabide hori itxi arte. Orduan, Jose Bergaminek egin bezala, Euskal Herrira jo zuen. 80ko hamarkadan "La Voz de Euskadi" egunkariaren sorreran hartu zuen parte, hori ere porrot ezagutu arte. Urte horietan "Interviu" aldizkarian ere idatzi zuen, besteak beste Arkautin sekretua zen Ertzaintzako "berrozien" basea ezagutarazi zuela.

Elkartearen ekimenez

Pepe Rei kultur elkarteak argitaratutako liburua hainbat kazetarik idatzitakoa da, ikerketa eta jendarte salaketa kazetaritzaren ikuspuntutik. Besteak beste, lan komun hori osatzen aritu dira Iñaki "Kitxu" Gonzalo Casal idazle itzubaltzetarra, David Fernandez CUP taldeko legebiltzarkide katalana, Ikerkuntza taldeko kide izan diren Ahoztar Zelaieta, Begoña Capape, Edurne San Martin, Javier Etayo "Tasio" komikilaria, Josemari Lorenzo Espinosa historiagilea, Xabier Makazaga, Juan Manuel Olarieta, Carlos Aznarez, Fernando Alonso, Txisko Espinosa, Rebeca Quintans, Gustavo Luca, Guillermo Martorell, Antonio Alvarez Solis eta German Gallego.

Ekimenaren kartela

Politika Getxo

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun