Leioako merkatariek Mari Pepa eta Arlote solidarioak jarriko dituzte salgai

Erabiltzailearen aurpegia Ukberri 2014ko abe. 12a, 12:25
Leioa Bidean ekimenarekin bat egin duten dendek Mari Pepa eta Arlote solidarioak jarriko dituzte salgai Gabonetako jai hauetan zehar. Bi tamaina desberdinetako 100 unitate izango dira udalerriko erakusleihoetan, burutazio batekin: "leioaztarrak konbentzitu beharrizan handia dutenei laguntzera". Leioako Udalaren ekimenez dator ideia, eta Leioa Bidean proiektuan dauden denden partaidetza izango du. Helburua da udalerriko Sortarazi GKErentzako dirua biltzea Leioan beharrizana duten familia eta pertsonen artean elikagaiak banatu ahal izateko, "geure solidaritatea behar dutelako", tokiko iturriek nabarmendu dutenez. Mari Pepa eta Arlote pertsonaia leioaztarren irudikapenak sortu dituzte Nigatik-artesaníak eta Mardela Pitxiak-ek, bi tamainatan, artilez eta eskuz eginak. Txikiek 10 euroko prezioa izango dute unitate bakoitzeko, eta handiek, aldiz, 20 eurokoa. Argazkian, Mari Pepa eta Arlote panpinak / © Leioako Udala.
Bikoteka edo banaturik, Mari Pepa eta Arlote oroigarri edo opari kutun eta solidarioa izan daitezke Eguberrian.

Gabonetako afari solidarioa

Gainera, Sortarazi GKErako diru gehiago batzeko asmoz, abenduaren 18an (osteguna), 20:30ean, afari solidarioa egingo da Mendibile Jauregian. Bertan, sei euskal diseinatzailek sortutako hiru Arlote eta hiru Mari Pepa bakar eta errepikaezin aurkeztuko dira, eta gau horretan jarriko dira salgai.

"Edozeini luzatzen diogu solidaritatez beteriko gau horretan parte hartzeko gonbita, udalerriko ondare den leku eder eta enblematikoan", adierazi dute Leioako Udaletik.

Afaria eta dohaintzaren prezioa 50 eurokoa da. Informazio gehiagorako edo lekua erreserbatzeko, deitu edo idatzi Behargintzara: 944 004 195 / behargintza[abildua]leioa.net.
Jendartea Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun