Aipatu udal ikerketa batzordean, Arruebarrena, "behin ez, birritan" azalpenak emateari uko egin diola azpimarratu zuen hereneguneko prentsaurrekoan Ruizek. Bizkaiko PPren idazkari orokorraren arabera, "Metroko kotxe-tokietan ezkutatuta" dago Leioako alkate ohia. Pinosoloko kiroldegiaren "mamuari" dagokionez, "1.800.000 euroko kostua" izan duela gaineratu zuen, lizitazio aurrekontuari begira Torresoloko igerilekuak "1.400.000 euroko gainkostua" izan duten bitartean.
Ez dute salaketa kenduko
Iñigo Urkullu EAEko lehendakariari zein Itxaso Atutxa Bizkaiko EAJren presidenteari "histrionismoa eta itxurakeriak alde batera uztea" eskatu zien Ruizek, "herri honetan EAJk ere kontuak eman behar dituelako kontrol organoetan". Hori horrela, PPren ordezkariaren ustez, "bere Gobernuak onartu zuen Kodigo Etikoa baino ez luke aplikatu behar" lehendakariak; eta Arruebarrenaren kargugabetzea sustatu.
Ildo berean, Metro Bilbaoren zuzendariaren kontra Pinosolo auziagatik Fiskaltzan aurkeztutako salaketa kentzeko "inolako asmorik ez" dutela ziurtatu zuen Bizkaiko PPren idazkari orokorrak: "ez gaude inoren irregulartasunak estaltzeko. Oinarria badago ikerketa sakona egiteko eta ikusiko da gero erantzukizun penalak ere egon daitezkeen", esan zuen.
Jeltzaleekiko harremanen hausturari dagokionez, "EAJrekin elkarrizketan aritzeko inolako arazorik ez" duela adierazi zuen Ruizek. Gaineratu zuenez, "lehenengo momentutik esan nuen" 2015eko Bizkaiko aurrekontuetarako lortutako hitzarmena "indarrean jarraitzen zuela", "Atutxak mehatxu egin arren".
Metro Bilbao garraio enpresako administrazio batzordean ordezkaritza daukaten erakunde publiko guztietan, Leioako alkate izandako Eneko Arruebarrena "berehala" kargugabetzea eskatuko du PPk, Pinosolon egindako kudeaketaren harira. Dagoeneko Eusko Legebiltzarrean aurkeztu dute ekimena. Beste horrenbeste egingo dute datozen egunetan Bizkaiko Batzar Nagusietan zein Bilbo, Santurtzi eta Getxoko udaletan; azken horretan zinegotzia ere baden Javier Ruiz Bizkaiko popularren idazkari orokorrak asteartean iragarri zuenez. Leioako kiroldegi berriko "harri bat ere jarri gabe leioaztar guztiei 3,5 euroko galera ekartzea" egotzi zion PPkoak Arruebarrenari. Izan ere, Pinosoloko proiektuari buruzko ikerketa batzordeak “ustelkeria zantzu garbiak" azaleratu ditu orain gutxi, oposizioko alderdi guztiek salatu dutenez. Eneko Arruebarrena alkate ohia eta Jon Loizaga Kirol zinegotzi ohia —biak ala biak EAJkoak— lotzen ditu izan omen diren irregulartasunekin. Hori horrela, popularren ustez, Metro Bilbaoko zuzendariak "ez du berme nahikorik eskaintzen, horren garrantzitsua den sozietate baten kudeaketa egiteko". Argazkian, Jesús Isasi alderdiko Azpiegitura bozeramailearekin batera eman zuen prentsaurrekoa Ruizek / © EAEko PP.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun