Gaurko ekimenaren bidez, presio hidraulikoa baliatuta lurzoruko arrokak hautsiz gasa ateratzeko aipatu teknika "ez dugula onartuko" gogorarazi nahi izan du Udalak. Argazkian, ekaineko udal batzarrean onartu bezala, frackingaren kontrako seinalea jarri zuen abenduaren 12an tokiko erakundeak, Loiola Ander Deuna kalean, BI-634 errepidearen gaineko pasabidearen aurrean.
Iazko uztailean Sopela “fracking gabeko herri” izendatua izan zen, eta aurtengo ekainean, praktika honekin lotura duten baimen guztiak bertan behera uztea aldarrikatu zuen Udalbatzak. EH Bilduren Udal Gobernuak aurkeztutako mozioak frackingaren bitartez aztertu, ikertu edo ustiatu daitezkeen hidrokarburo ez konbentzionaletarako Ikerketa Baimen guztiak bertan behera geratzea eskatzen zion Hidrocarburos de Euskadi enpresa publikoari.
400 lagun baino gehiago elkartu dira gaur Sopelako Udalak fracking-aren kontra antolatutako kalejiran. Jai-giroan, Sopelako auzokideak, Udal Gobernuko ordezkariak eta fracking-aren kontrako mugimenduko kideak elkartu dira, "Sopela fracking gabeko herria" leloa argi eta garbi aldarrikatzeko asmoz. Era berean, Espainiako Gobernuari eta Eusko Jaurlaritzari haustura hidraulikoarekin lotutako baimen guztiak bertan behera utzi ditzatela eskatu die Udalak. Sopelak Espainiako Gobernuaren lehenengo jakinarazpena jaso zuen azaroan, Geminis baimen-eremuan (Bizkaian) egin nahi dituzten proba sismikoen harira. Argazkian, sopeloztarrak udalerriko kaleetan manifestatu dira goizean / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun