Emakumeon topaketak

Larunbatean Mujeres con Voz elkarteak antolatutako Kultura arteko Askarian egon nintzen Faduran. Jatorri anitzeko emakumeak bildu ginen, eta beste herrietako janariak eta edariak daztatzeko aukera izan genuen, baina ez hori soilik... Lemak zioenez "Askotarikoak eta bat eginik, kulturak deskubritzen" ez ezik, pertsonak ezagutu ere egin genuen.

Berdintasun Sailetatik emakumeen elkarteek egiten dituzten ekitaldiak ezagutzera ematen dizkigute. Ez da lehenengo aldiz larunbatekoa bezalako ekitaldirako gonbidapena edo heltzen zaidala... Eta askotan joateko asmoa izan dudan arren, atzera egin dut (larunbat arratsaldean libre izatea konplikatua da, ez dut inor ezagutzen, ez dakit ongi etorria izango naizen...). Martxoaren 8an, berriz, Bilgunek, Mujeres con Voz eta beste elkarte feministek Algortan antolatutako ekitaldian, ezagutzen ez nituen jatorri ezberdinetako emakumeekin zuzeneko harremanak egiteko aukera izan nuen. Oso aberasgarria iruditu zitzaidan, esperientziak partekatzeko aukera izan genuen-eta.

Martxoaren 8an egindako hurbilketa horri esker, larunbatean ez nuen dudarik izan, eta Fadurara gertutatu nintzen beste lagun batekin. Herri ezberdinetako janariak dastatzea zen aitzakia. Baina ez ginen horretara mugatu, eta dinamizatzaileek bikain nahastu gintuzten, gero batzeko eta gure gauzen inguruan hitz egiteko. Emakumeon gauzez ari ginen. Gai unibertsalak dira emakumeonak. Eta luzez aritu ginen (hala ere denbora ti-ta batean pasatu zitzaigun)...

Guri "Emakumeon arteko topaketa" esaldiari buruz hausnartzea egokitu zitzaigun, eta bertan azaldu zuten, askorentzako horiek zirela "une propioak", baita "besteak" ezagutzeko topaguneak, eta, zergatik ez "barruak hustutzeko" tarteak..., eta horren guztiaren gainetik, "elkartasuna eta beroa" sentitzeko topaketak, bereziki garrantzitsuak familia inguruan ez baduzu, edo heldu berria zarenean. Une batean galdetu zidaten ea nola sentitzen nintzen, ea gustora nengoen, edo deserosoa... Etxean bezala erantzun nien. Lagunen artean. Eta zer eramaten nuela esan behar izan nuenean, hori esan nien: izen asko. Izen bakoitzaren atzean emakume bat -Rossana, Fatou, Marian, Gaby, Zuriñe, Maria, Nora...-. Beraz, hurrengo topaketan, emakume berriak ezagutzeaz gainera, lagunak berraurkituko ditut eta solasaldia utzitako tokian berreskuratuko dugu.

 

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun