Gainera aldentze abiadura eta honainoko distantzia proportzionalak direla frogatu zuen: zenbat eta urrunago egon, gero eta bizkorrago aldentzen da gugandik. Hubble-en legea deritzo. XX. mendeko aurkikuntza harrigarrienetariko bat da. Baina, zelan behatu zuen galaxia guztiak aldentzen daudela? Doppler efektuan oinarritzen da. Denok nabaritu dugu noizbait. Espaloian egonda motorra bat gerturatzen bazaigu soinu altua antzemango dugu, eta gure aurretik igaro eta gero, aldentzean, soinua baxua izango da,...ñiiiiiii....uuuuuw. Uhin igorle bat gerturatzen dagoenean, uhin fronteak pilatzen dira bere aurretik, frekuentzia handiagoa ailegatzen zaigularik, hau da, legokion baino soinu altuagoa, eta aldentzen denean uhin fronteak sakabanatzen dira, soinu baxuagoa bidaliz. Argia ere uhin bat da, kasu honetan elektromagnetikoa, eta frekuentzia, kasu honetan, ez da soinuaren altuera baizik eta kolorea, eta efektu berbera sortzen da. Hau da, argi igorle bat aldenduz doanean dagokion baino frekuentzia txikiagoa igortzen du, eta kolorea, legokiona baino gorriagoa da. Gorrirako desplazamendu hau galaxia guztietan behatu da, unibertsoaren hedakuntza baieztatuz.
Gaur gauean, ilunabarraren isilpean, altxatu aurpegia izarretarantz. Gizakiok milaka urtetan zehar bizkarrezurrean sentitu dugun zirrara sumatuko duzu. Amets egin. Zientziaren eskutik.