Leioako alkate izandako Eneko Arruebarrena Metro Bilbaoko zuzendariak atzo agertu behar izan zuen Eusko Legebiltzarreko Lurralde Politika eta Ingurumen Batzordearen aurrean. Kale egindako Pinosoloko kiroldegiko proiektuari buruz berbarik ez zuen esan udal agintari ohiak, aipatu batzarrera "Metro Bilbaoko zuzendari gisa deituta" zegoela uste zuelako. Gaineratu zuenez, "bost urteetan zehar daborduko eman ditut azalpenak udal batzar eta Leioa Kirolak erakundeko batzorde askotan". Amaitu zuenez, "Fiskaltzak edo epaileak eskatzen baldin badu, lasaitasun osoz joango naiz beraien aurrera". EH Bildu, PSE-EE, PP eta UPyDren galderei ez zien erantzun gura izan Arruebarrenak.
EH Bilduk eskatuta egin zuen agerraldia Leioako alkate ohiak. Koalizioak gura nahi zuen Jaurlaritzak ze iritzi duen Arruebarrenaren izendapenaz. “Erakunde publikoetatik urruti egon behar zen pertsona, beste erakunde publiko baten buru jarri dute EAJk eta Lakuak. Hain zuzen, ardura handiagoko kargu batean jarri dute, Leioako Udalak eta Bizkaiko Batzar Nagusiek kargutik kentzea eskatu duten arren”, esan zuen Igor Lopez de Muniain legebiltzarkideak. Laster, gaitzespen hori Gasteizko ganberan ere egingo dela aurreratu zuen ezkertiarrak. Leioako zinegotzi Arkaitz Fullaondok adierazpenak egin zituen agerraldiaren ostean. “Negargarritzat” jo zituen azalpenak. “Beste behin, mutu geratu da, iseka eginez Gasteizko legebiltzarrari eta herritarrei”, adierazi zuen.
Bitartean, Lurralde Politika eta Ingurumen Batzordera ere deitutako Ana Oregi sailburuak Arruebarrenaren "gaitasuna eta profesionaltasuna" nabarmendu zituen, "edozein zalantzaren gainetik". Izan ere, EAJk Arruebarrenaren kontrako "lintxamendutzat" jotzen du Pinosolo auzia.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
