Pazko Astean hasita, etxean sortutako hondakin organikoak, gordinak ala kozinatuak, batzeko 69 edukiontzi jartzen hasiko dira Leioako kaleetan. Horiek denek zabaltzeko sistema elektroniko berritzailea edukiko dute. Bosgarren edukiontziagaz, edo edukiontzi marroiagaz, bat egiten duen sendi bakoitzari material organikoa batzeko kita emango diote doan. Denetara, 4.500 kit banatuko dira apirilaren 7tik aurrera udaletxean, Udal Bulego Teknikoan (Errekalde plaza, 1), Pinuetako udal bulegoan (Langileria, 202) eta Informazio bulegoan (Independentzia, 10-behea).
Halaber, hilaren 7tik 10era, informazioa emateko karpa jarriko dute Sakoneta kiroldegiaren kanpoaldean, Udondoko bulebarrean, Txorierrin eta Lamiakon, hurrenez hurren. Azkenik, apirilaren 13an Basaez auzoan jarriko dute. Informazio guneen ordutegia 11:00etatik 14:00etara eta 16:30etik 19:00etara izango da.
“Garrantzitsua da aipatzea ezin dela plastikozko poltsarik erabili, bakarrik poltsa biodegragarriak, kitean datozenak bezalakoak”, gogoratu du Mari Carmen Urbieta alkateak. Batu ostean, hondakin organikoak Bizkaiko Konpostegira, Artigasera, eroango dituzte, konposta egiteko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
