Leioako PPk egindako salaketaren aurrean, San Juan jaietako txupina botatzeko ekitaldia "inongo istilu barik eta jai giroan" igaro zela adierazi du EH Bilduk, "bertan egon ziren ehunka leioaztarrek egiaztatu dezaketen bezalaxe". Aitortu dutenez, urtero moduan, koalizio abertzaleko zinegotziek euskal preso politikoen dispertsioagaz bukatzea aldarrikatzen duen ikurra erakutsi zuten, "Euskal Herrian eta Leioan herritarren gehiengoaren aldarrikapen sozial eta politikoa dena". Horregaz batera, "Kurkudi Libre" aldarrikapena irakur zitekeen pankarta ere erakutsi zuten. Izan ere, Espainiako Gobernuak Leioako herriko taberna konfiskatu, zigilatu eta enkantera aterako du eta horren aurrean protesta eta elkartasuna adierazi gura zuten.
Gertaera horren "larritasunaren" aurrean, EH Bilduko zinegotziek korporazioaren argazkian ere pankarta erakutsi zuten. "Momentu horretan PPko zinegotziak argazkitik erretiratu ziren eta Kurkudi herriko tabernarekiko elkartasun mezuak ezabatzeko eskatu zuten; EH Bilduko zinegotzi batek zeroan kamiseta kentzea ere eskatu zuten. Bertan "Libre" irakur zitekeen", azaldu dute.
Leioako EH Bildukoen berbetan, "dirudienez Leioako PPk ez du nahikoa Kurkudi herriko tabernaren konfiskazioagaz, eta Euskal Herriko 107 herriko tabernen espoliazioagaz. Horregaz batera, elkartasuna isilarazi eta ezkutatu gura du. Horretarako istiluak sortu eta ikusarazi gura ditu horrelakorik gertatu ez den lekuetan, baita Leioako Udaleko zinegotzien adierazpen askatasuna erasotuz ere".
"Leioako EH Bildutik jai eredu herrikoi, parte-hartzaile eta aldarrikatzaile batzuen alde lanean jarraituko dugu. Giza eskubideen alde lan egiten, dispertsioaren bukaera aldarrikatzen eta Kurkudi herriko taberna babesten jarraituko dugu, berau beharrezkoa den eremu denetan", amaitu dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.