Euskararen Nazioarteko Egunaren harira, EHUko Gizarte eta Komunikazio Zientzien Fakultatean Kazetaritza, Publizitatea eta Ikus-Entzunezko graduak ikasten hasi diren lehenengo kurtsoko ikasleek (KAPUKO 31 eta 46) kanpaina bat jarri dute martxan. Ekimenaren helburua euskararen erabilera sustatzea da; hala nola, euskara dakitenek euskaraz berba egiten jarraitzea, euskaraz ez dakitenei euskara ikastera animatzea eta euskara dakitenek, baina berba egiten ez dutenek, hizkuntza geroz eta gehiago erabiltzea. "EHUn pauso" izan da erabakitako izengoitia, jendearen interesa pixkanaka pizteko. "Aurre-kanpaina honetan 15 segundoko bideoak grabatu dira eta hainbat argazki egin dira sare sozialetara igotzeko, Euskararen Egunari buruz oraindik zuzenean ezer aipatu barik", azaldu dutenez. Horregaz batera, abenduaren 3rako, hainbat ekitaldi antolatu dituzte.
Sare sozialetan eta Interneten hainbat profil eta orrialde jarri dituzte martxan "EHUn pauso" izenagaz, hala nola: Twitter, Facebook, Instagram eta Youtube erabiltzen dituzte euskarri moduan sortutako materiala elkarbanatzeko eta saretzeko.
Martxan jarri duten kanpaina Abenduaren 3an amaitzen ez dela diote arduradunek; etorkizunean beste hainbat ekimen burutzeko prest agertu dira eta epe luzerako proiektutzat deskribatu dute ekimena.
Azkenik, antolatu dituzten ekitaldietan parte hartzeko deia luzatu dute, ekimenak guztiz irekiak eta anitzak direla esanez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
