Kirol lehiari dagokionez, Leioa eta Sestao Riverren arteko aurrekaririk hurbilena denboraldi honetako bigarren ligako partida izan zen, Sarrienan jokatu zena. Orduan, berde-beltzek 0-2 irabazi zuten, Jito Silvestrek eta Rodri Martínezek sartutako golei esker. Igor Gordobilen taldea, bere aldetik, Zornotzan irabaztetik zetorren, baina prestakuntza fasean zegoen oraindik.
Ezkerraldekoak zazpigarren postuan heldu dira Bizkaiko derbi berri honetara, sei garaipen, hamar berdinketa eta lau porrot jaso ostean. Bitxikeria moduan, berdinketa gehien duen taldea da Sestaokoa, erdia hain justu.
Gainera, Barakaldo eta Real Madrid Castilla dira Sestao Riverrek baino partida gutxiago galdu dituzten bakarrak. Zenbaki bikain horiek are hobeagoak dira Las Llanaseko norgehiagokak aintzat hartz gero. Etxean, Barakaldok bakarrik irabazi die, 2015eko azken jardunaldian, hain zuzen ere.
Pasa den aste-akabuan, lehiakortasun handiko Ezkerraldeko derbian, Sestao Riverrek 1-2 irabazi zion Portugaleteri bere zelaian, Floridan, etxeko taldeak lehen gola sartu arren. Berde-beltzen golegilerik onena Mikel Abaroa erdilari bizkaitarra da, Eibar eta Real Unionen jokalari ohia. Bost gol daroatza, Jito aurrelari katalan nekaezinak baino gol bat gehiago.
Leioa, behetik gora egin guran
Leioak, bere aldetik, azken hamabi puntuetatik bakarra eskuratu du eta hiru porrot darama jarraian, Amorebieta, Real Union eta Real Sociedad Bren aurka. Berdinketa bakarra Sarrienan lortu zuten Leioako mutilek, orduan Zinedine Zidanek zuzentzen zuen Real Madrid Castillaren aurka. Azken garaipena, ostera, abenduaren 6koa da. Egun hartan, Rayo Majadahondari irabazi zioten bere zelaian, Cerro del Espinon.
Beheraldi txiki horren ondorioz, Igor Gordobilen mutilek galdu egin dute urrian eta azaroan lortutako koltxoi erosoa. Orain, Leioako taldea 14. dago sailkapenean, 24 puntugaz. Jaisteko eta play-out postuetatik zein zuzenean jaisteko postuetatik puntu bakarrera, beraz.