Icazak ohartarazi duenez, abenduaren erdialdean egoera "jasangaitza" bilakatuko da, "gastuak diru-sarrerak baino handiagoak izango direlako". "Enpresako zuzendaritzak ikusten duen irtenbide bakarra produzitzeari uztea da; hilabete batean lan egin eta hurrengoan gelditzea gura dute", adierazi du Vicrilako langileen ordezkariak. Hala, Lamiakoko beirategiaren iraupena bermatu ahal izateko, diruz laguntzea eskatu zioten beharginek Eusko Jaurlaritzari; azaroaren 14an bildu ziren Gasteizko Gobernuko ordezkariakaz. Batzar hori, ordea, "etsigarria" izan zela dio Icazak. Azaldu duenez, "dirua eskatu genien eta Europak horrelakorik egiten ez duela uzten erantzun ziguten. Gauzak horrela, bankuek finantziazio-lerro berriak ezar ditzaten, bitartekaritza-lana egin dezala galdegin genuen". Vicrila "zulotik irten" dadin, gehiago inplikatzea eskatzen diote langileek Eusko Jaurlaritzari.
ARC Frantziako multinazionalak berriro erosi gura omen du Vicrila; gaur egun, hartzekodunen konkurtsoan dago Lamiakoko beirategia. Hala, balizko erosle gehiago aurkitzen laguntzea ere eskatu zion langile-batzordeak Eusko Jaurlaritzari. "Daborduko lantegia erosteko prest egongo litzatekeen funts bat aurkeztu dutela erantzun ziguten", esan du Icazak.
Azaroaren 14an ere Leioako Udalbatzarrak hartutako erabakia goretsi dute langileek. Besteak beste, Lamiakoko beiragintza-lantegia kokatuta dagoen industria-zoruaren kalifikazioa ez aldatzea eta Eusko Jaurlaritzari laguntza eman dezan eskatzea onartu zuten, aho batez, alderdi politiko denek.
