Jendartea  Leioa 2017-07-14 11:16

Sakonetako muskulazio-gela kudeatzeko kontratua luzatuko du Leioako Udalak

Kontratuen epea amaitzean, horiek luzatu ordez, Klausula Sozialak txertatuko zituzten plegu berriak egitea onartu zuen Leioako Udalbatzak, 2014ko martxoko osoko bilkuran. EH Bilduren bertoko taldeak kritikatu duenez, "azken hiru urteetan onartutako erabakia ez dute bete". Oraingo honetan, Sakoneta kiroldegiko muskulazio-gelaren gestiorako kontratua bukatu ostean, "berriro ere osoko bilkurak hartutako erabakia alde batera utziko dute", zinegotzi ezkertiarrek gaitzetsi dutenez.

Sakonetako muskulazio-gela kudeatzeko kontratua luzatuko du Leioako Udalak
Sakonetako gimnasioa, artxiboko irudian. © LEIOAKO UKI | Ikusi handiago | Argazki originala

Ekaineko Kirol Batzordean azaldu legez, muskulazio-gelaren kontratua ekainean bukatu zen, eta berau kudeatzeko kontratua prest ez egotearen ondorioz, plegu berria prest izan arte, kontratu hori luzatzea erabaki zen. "Kudeaketa eredu hori guztiz kaltegarria da Leioako Udalarentzat; ez da erabiltzaileen beharrizanei erantzuteko gai. Horrek egoera jasanezina sortzen du: leku-falta nabaria, makinen egoera prekarioa, teilatuaren altuera okerra…", salatu du Leioako EH Bilduk. Ezkerzaleen ustez, "horrek agerian utzi du kudeaketa eredu horrek ez duela funtzionatzen: enpresa-kudeatzaileak irabazi handiak lortzen dituen bitartean (kuoten %60), gimnasioaren egoerak ez du hobera egiten".

Leioako EH Bilduk Sakoneta kiroldegiaren kudeaketa eredua kritikatu zuen orain dela hilabete batzuk; tartean, muskulazio-gela egoera kaskarrean zegoena mahaigaineratu zuten. "Guk aurkeztutako mozioa bi hilabetez atzeratu izan da, eta ez da oraindik Udalean eztabaidatu. Horren ondorioz, kontratua bukatu egin denerako, Udalak oraindik ez dio irtenbiderik bilatu egoera horri", gaitzetsi dute.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa