Langileen inguruko iturriek adierazi dutenez, Vicrila beirategiaren jabe egiteko aurkeztutako hiru eskaintzetatik "lan-kostu txikiena" daukana da Mivaricarrek mahaigainean ipinitakoa. Hala ere, 270 beharginetatik 240era murriztu gura dute lantaldea, soldatak murrizteaz batera.
Lamiakoko Vicrila beirategiaren likidazio-prozesuaren ardura daukan konkurtso-administrazioak ere egokienatzat jo zuen Mivaricar S.L. enpresak egindako eskaintza, joan den astean. Langileen-ordezkariek eta sozietate horrek aurrehitzarmena izenpetu ostean, Bilboko Merkataritza arloko 1 zenbakiko Epaitegiari dagokio aurkeztutako hiru enpresetatik (Mivaricar, Sherpa eta Idurgo) zeinen eskaintza ontzat hartzen duen. Dena den, beharginen inguruko iturriek nabarmendutakoaren arabera, likidazio-planean epaileak zehaztutako neurrietako bat ez dute bete Sherpak eta Idurgok: ez dute milioi bat euroko gordailutzea egin.
Vicrilaren erreskatea birritan kale egin ostean, lantegia saltzea aurreikusten du likidazio-planak. Oraingo aukera galduko balitz, sortaka salduko lukete beirategia; Vicrilaren amaiera izango litzateke.
