Jausitako sabai faltsua muskulazio-aretokoa izan zen, zehazki. Momentu horretan erabiltzaile bat eta begirale bat zeuden bertan, baina ez zaie ezer jazo. Ezbeharrak haserrea eragin du herritar askorengan, eta kiroldegiaren kudeaketaz kritika ugari zabaldu da, leihoa.info webguneak jaso duenez.
Erabiltzaile batzuk kexatu egin dira kiroldegia ustiatzen duen enpresaren eta Udalaren beraren "utzikeria" dela eta. Egoeragatik protesta egitera animatu dituzte leioaztarrak. Beste batzuek kiroldegi berri eta duina eskatu dute, gertatutakoa ikusita.
Udalak ohar bat kaleratu du ezbeharraz. Azaldu dutenez, Mari Carmen Urbieta alkatea kiroldegira joan da sabaia jausitako aretoaren egoera begiztatzera. "Lehenbailehen hasiko gara lanean kalteak konpontzeko, eta ahalik eta lasterren normaltasunera bueltatzeko", adierazi du. Sabaia jausi den aretoa itxi beharko dela gehitu du alkateak, bana ez kiroldegi osoa. Momentuz ez da azaldu jazotakoaren zergatia.
