Migratzaileekiko arreta hobetu eta haien integrazioa sustatu gura du Udalak

© LEIOAKO UDALA

Immigrazioaren eta Bizikidetzaren II. Plana aurkeztu zuten atzo Leioako alkateak, Iban Rodriguezek, eta Gizarte Zerbitzuetako zinegotziak, Juan Carlos Martínezek. Adierazi zutenez, kanpotik etorritakoen gizarteratzea eta kultur aniztasuna kudeatzea dira helburu nagusiak. 2001etik 2018ra, atzerriko pertsona-kopuruaren hazkundea %375ekoa izan da Leioan.

2023ra arte egongo da indarrean Udalak onartu berri duen Immigrazio eta Bizikidetza II. Plana, eta gizarte-kohesioa hobetzea izango du helburu besteak beste. Hiru ardatzetan oinarrituko da: kanpotik etorritakoei harrera hobetu eta Udalarekiko elkarrekintza arinagoa sustatzea; kulturen arteko bizikidetza bultzatzea; eta immigrazioaren arloan Leioako Udalaren erantzuteko gaitasuna hobetzea.

Planak hamazortzi jarduera aurreikusten ditu helburu horiek lortzeko. Azaldu dutenez, hainbat eragileren ekarpenak kontuan izanda osatu dute: udal-sailak, gizarte-eragileak eta herritarrak, bertan nahi atzerrian jaiotakoak.

Migrazio-datuak

2001tik 2018ra bitartean, atzerritar jatorrikoen kopurua 660tik 2.535era igo da Leioan. Hau da, %375eko igoera. Denbora-tarte berean bertan jaiotakoen populazioa ere handitu da, baina ez neurri berean: 26.676tik 28.369ra, alegia %6. Udalerriaren joera, migrazioaren hazkundeari dagokionez, Bizkaikoaren eta EAE osokoaren pare dago. 

Erlazionatuak

Aniztasuna izango da gure ezaugarria etorkizunean

Uribe Kosta

Migrazioa mundu osoan ematen den fenomenoa da; betidanik existitu da. Leku batetik bestera mugitzea gizon-emakumeen garapena bermatzeko ezinbesteko...