Maiatzaren 14tik 17ra zen egiteko Umore eta Kaleko Artisten Azokaren 21. edizioa, baina koronabirusa gailendu da azkenik. "Leioa udalerri arduratsua da, eta beste ezeren gainetik pertsonen segurtasuna dago”, esan du Rodriguezek. Bestalde, pandemiak sortutako egoeran ezinezkoa izango litzateke ekimena ohiko moduan egitea.
Azokaren arduradunek azaldu dutenez, alarma-egoerak muga asko ezarri dizkie taldeei euren lanak prestatu ahal izateko. Kontuan izan beharra dago 25 estreinaldi zeudela iragarrita edizio honetarako, "baina konpainiek zailtasun handiak izan dituzte euren sorkuntza lan berriak aurkezteko, eta logistika-kontuak kudeatzeko".
Beste horrenbeste esan daiteke Leioara etortzen diren artista guztiak artatzeko azpiegiturez: lo egiteko eta jateko lekuak, antezpeneterako behar diren egiturak... "Horiek ezinbestekoak dira eta une honetan ez dira erabilgarriak". Honenbestez, datorren urterako hitzordua egin dute daborduko: hogeita batgarrena, 2021ean.
