Udalak azaldu duenez, COVID-19ak sortutako krisia dela eta jarduera ekonomikoa bultzatzeko ezohiko diru-laguntzen deialdia norberaren konturako langile fisikoei edo autonomoei zuzenduta dago, bai eta hamar langile baino gutxiagoko enpresei ere, baldin eta haien negozio- edo balantze-bolumena ez bada bi milioi eurotik gorakoa eta egoitza fiskala Leioan badute. Eskatzaile bakoitzak 900 euro jaso ahal izango ditu gehienez, biztanleria konfinatzean eta lan-jarduerak eten edo murriztean sortutako galerak arintzeko.
Diruz lagundu daitezkeen kontzeptuek honako hauek barne hartzen dituzte: lokalen errentamenduak, gizarte- eta langile-gastuak, babes-ekipamenduetako gastuak eta prebentzio eta higiene sanitarioko materialak, seinaleztapen-elementuak, bai eta telelan-neurriak eta digitalizazioa errazten dituzten ekipamendu, programa eta zerbitzuak ere.
Hurrengo neurriak
Gainera, Udalak beste 100.000 euro bideratuko ditu aurten, deskontu-bonuen bidez tokiko merkataritzan erosketak egitea sustatzeko kanpaina bat garatzeko, bai eta hurbileko merkataritzari babesa eta laguntza emateko beste komunikazio-ekimen batzuk garatzeko ere. "Dagoeneko ezartzen ari diren beste neurri batzuez gain, hala nola ostalaritzarako terrazen tasatik salbuestea edo horien ordutegia zabaltzea", gaineratu dute.
