Leioa Martxan elkartea

"Avanzada guztiz estali behar dute, ez dugu gehiago jasango errepide hau"

Pandemiaren ondoriozko konfinamendua hasi baino aste batzuk lehenago eratu zuten Leioa Martxan, "garapen jasangarriaren aldeko elkartea". Momentuz helburu bakarra eta argia dute: La Avanzada errepidea osorik estal dadila. Javier Royo taldeko kideak azaldu duenez, ez zaie onargarria iruditzen orain dela pare bat aste Bizkaiko Foru Aldundiak esleitutako proiektua, hau da, tunelaren alde biak 90 metro inguru luzatzea. Leioari dagokionez, errepidea oso-osorik estalita egotea gura dute.

"Egunero, batez beste, 132.000 auto igarotzen dira Avanzadatik", dio Javier Royok, "45 milioi inguru urtean". Espainiako Estatuan trafiko gehien duen hogei errepideetako bat da, "eta lehen hogei horietatik herri bat zeharkatzen duen bakarra". Royoren esanetan, auto-kopuru horrek "egundoko kutsadura" eragin behar du, eta ez bakarrik zaratari dagokionez. Honenbestez, Aldundiak iragarritako egitasmoa ez zaie nahikoa iruditzen, "kutsadura herriko leku batetik bestera eroan besterik ez da lortuko eta". Leioa Martxanen eskaria beteko balitz, alde bakoitzetik 500 metro inguru gehiago estali beharko lirateke. 

Aldundiak aurkeztutako proiektuaren lanak 2023an hastekoak dira, eta esleipena bi milioi euroan eman dute. Herritarrek sortutako elkarteak, berriz, beste data bat du gogoan: "Arazo hau 2025erako konponduta egotea gura dugu". Alderdiakaz berbetan dabiltza, babes bila, eta erakundeen ateak ere jo dituzte hilabeteotan. "Aldundian esan ziguten guk eskatzen duguna teknikoki bideragarria dela, eta orain borondate politikoa besterik ez da behar, eta borondate politikoa diogunean diruaz ari gara argi eta garbi, hau da, aurrekontuen osaketaz. Eta azkenean irtenbide hori egingarria ez balitz, beste alternatiba bat bilatu beharko dute". Royoren esanetan, errepide Leioaren erdigunetik ateratzea izan liteke horietako bat. "Baina ez dugu erdibideko konponbiderik onartuko, ez dugu errepide hau gehiago jasango".

Bitartean, lehenbailehen ezartzeko hainbat neurri eskatu ditu Leioa Martxanek, esaterako kutsadura-neurgailuak ipintzea inguruan, eta gehienezko abiadura orduko 60 kilometrora jaistea (80koa da gaur egun).

Erlazionatuak

Avanzada errepidea berrantolatzeko obren lehenengo fasea amaitu dute

Leioa

Bizkaiko Foru Aldundia Leioako tunelaren eta Artatzako biribilgunearen artean egiten ari den jarduketaren bidez, bide-segurtasuna hobetu gura da, e...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun