Espainiako Auzitegi Gorenak aintzat hartu du Jose Maria Martinez Sanz Gazteluetako irakaslearen defentsak aurkeztutako helegitea, eta nabarmen murriztu du orain dela urte bi haren aurka Bizkaiko Probintzia Auzitegiak adingabeko ikasle bati egindako sexu-abusuengatik ipinitako espetxe-zigorra. Izan ere, hasiera batean hamaika urtekoa izan zen zigor hori, baina bi urteraino jaistea erabaki du Gorenak, eta honenbestez, irakasleak aukera izango du espetxean ez sartzeko, abusuak egon zirela frogatutzat ematen bada ere.
Auzitegi Gorenaren ustez, biktimak salatu zituen gertakari larrienak (sexu-jarduera esplizituak) ez daude frogatuta, hainbat hedabidek jaso dutenez. Izan ere, Martinezen abokatuak aurkeztutako helegitearen funtsa zen ikasle ohiaren kontakizunak ez zuela behar besteko sendotasunik, eta hasieran Bizkaiko Auzitegiak erabakitakoa bezain zigor handia ezartzeko froga-karga handiagoa behar dela. Hala ere, Gorenaren epaiak frogatutzat ematen du abusuak egon zirela.
Besteak beste, argudiatu dute biktimak ez zuela salatutako gertakarien berri eman hainbat urte igaro arte. Gogoan izan beharra dago abusuen garaian ikaslea adingabea zela, eta adinez gorakoa zenean salatu zituela abusuak. Haren familiak ez du baloraziorik egin gura izan epaia arretaz irakurri eta aztertu arte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
