Bere horretan mantenduko da Leioako Etxez Etxeko Laguntza Zerbitzua

Joan den astean elkarretaratzea egin zuten Leioako Etxez Etxeko Laguntza Zerbitzuaren erabiltzaileek eta beharginek, Udalak iragarritako murrizketengatik protesta egiteko. Orain, berriz, zerbitzuak lehengo prestazioei eutsiko diela jakin da.  

Udaleko Gizarte Ongizate Sailak eskutitz bidez jakinarazi zien erabiltzaileei joan den astelehenetik (urriak 26), eta urtea amaitu arte, gutxitu egingo zela "zerbitzuaren intentsitatea". Sail horretako arduradunak, Juan Carlos Martinez zinegotziak, asmoa agertu zuen "zerbitzuak ahalik eta gehien doitzeko, ahalik eta kalterik txikiena eragiteko". Hala, aurreikusita zegoen autonomia duten pertsonek zerbitzua jasotzeari uztea guztiz, eta I, II eta III graduetako mendekotasuna dutenen kasuan ordutegia laburtzea, bakoitzaren beharren araberako proportzioan. Erabakiak protestak eragin zituen, eta, azkenik, murrizketak bertan behera geratu dira.

Zerbitzuko langileek asmoa agertu zuten joan den urriaren 29ko osoko bilkurara joateko, egoerak eragindako kezka zuzenean azaltzeko. Iban Rodriguez alkateak ez zien horretarako baimenik eman, COVID-19a dela eta bete beharreko osasun-neurriak direla eta; horrenbestez, beharginek udaletxearen kanpoko aldean egin zuten protesta.

Erlazionatuak

Elkarretaratzea egin dute Etxez Etxeko Laguntza Zerbitzuaren murrizketa salatzeko

Leioa

Udalaren Etxez Etxeko Laguntza Zerbitzua ematen duen Sacyr enpresako langileek eta zerbitzu horren erabiltzaileek (55 pertsonak denera) elkarretara...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun