EAJk kritikatu egin du Leioako EH Bilduk udal-arkitektoaren aurkako pintaden auzian izandako jokabidea

Talde politiko horren izena aipatu gabe bada ere, EH Bilduren aurkako kritika plazaratu du Leioako EAJk, udal-arkitektoaren aurka egindako pintaden harira sortu den ika-mikaren testuinguruan. EH Bilduk ez zuen bat egin Udalbatzako gainerako indarrek eraso horri erantzunez egindako adierazpenagaz, eta jazotakoa gaitzesteko beste testu bat argitaratu zuen. Hala jokatzea leporatu dio EAJk orain.   

"Deitoratzen dugu, gaur egun ere, sektore batzuek beharrezkoa ikusten jarraitzea kondenei ñabardurak jartzea hain gertaera larrien aurrean", adierazi du EAJk sare sozialen bidez zabaldutako idatzian. "Alkateak talde politikoei aurkeztutako gaitzespen-testua ez zegoen itxita", diote jeltzaleek, "eta ñabardurarik behar ez zela ikusita ere, hasiera batean eskatzen zuten aldaketa eskaini zitzaien [EH Bilduri], eta agerian geratu denez, eskua luzatzen zitzaiela ikusi ondoren, nahiago izan dute baldintzak jartzen jarraitu, antza denez, lortu nahi zuten helburu bakarra lortzeko: gertaeren erabilera politikoa egitea eta biktima gisa aurkeztea, hemen bi biktima baino ez daudenean, udal-arkitektoa eta printzipio demokratikoak".

Bestalde, koalizio abertzaleari gezurra esatea aurpegiratu diote, "Bozeramaileen Batzordea gertaera horiek aztertzeko deituta zegoela esatean". Batzordea aurretik deituta zegoela adierazi du EAJk, eta pintaden berri geroago izan zutela.

EAJk kaleratutako kritikaren gaineko eztabaida ikus daiteke (gaztelaniaz) Leioako gaiez jarduteko Facebookeko orri honetan.

Erlazionatuak

Udal-arkitektoaren aurka egindako pintadak gaitzetsi ditu Leioako EH Bilduk

Leioa

Leioako alkate Iban Rodriguezek prentsaurrekoa eman zuen atzo Udal Bulego teknikoan agertu zen udal-arkitektoaren aurkako pintada gaitzesteko. Amai...
Udal-langile baten aurka agertutako pintadak gaitzetsi ditu Leioako Udalak

Leioa

Anton Uncilla udal-arkitektoaren aurka agertutako pintadak direla eta gaitzespen-adierazpena publiko egin du Leioako Udalak. Testuan ez da zehazten...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun