Zineforum Perseok eta Leioako Udalak hitzarmen berria adostu dute

Zineforum Perseok berriro ekingo dio jarduerari apirilaren 13an. © KULTUR LEIOA

Sei hilabete emanaldirik gabe egon ostean, Zineforum Perseok eta Leioako Udalak hitzarmena sinatu dute Kultur Leioaren erabilera adosteko. Aurtengo lehen zikloa apirilaren 13an egingo dute.

Zineforum Perseo elkarteak idatzia bidali die dituen 400 bazkide baino gehiagori azaltzeko Leioako Udalagaz adostu duten hitzarmenaren nondik norakoak. Horren bitartez, sei hilabeteko etenaldi luzeari amaiera emango diote, eta elkarren arteko harremana normalizatzeko bidea adostu dute.

Besteak beste, hitzarmen berrian adierazten da Udalak zineforumaren jarduera erraztuko duela, eta, zentzu horretan, Leioako Zineforumaren programazioak "lehentasuna izango du pelikulen aukeraketan kointzidentziarik egongo balitz". Halaber, emanaldi guztiak kultur aretoaren iragarpenen tabloian argitaratuko dira, eta Kultur Leioak zineforumean egingo diren emanaldien kartelak eta trailerrak eskuratzeaz arduratuko da, horien promoziorako.

Sarrerei dagokienez, salgai jarriko dituzte zikloa hasi aurreko hilabetearen azken eguaztenean; pertsona bakoitzak gehienez zortzi eskuratu ahalko ditu. Gainera, elbarritutako pertsonen irisgarritasuna bermatzeko bi eserleku gordeko dituzte, eta boluntarioek ere doako jarlekuak izango dituzte.

Aurtengo lehen zikloa

Iragarri dute aurtengo lehen zikloa apirilaren 13an egingo dutela, Jainkoak versus gizakiak izenpean. Bertan, hiru pelikula proiektatuko dituzte: Dios es mujer y se llama Petrunya, Corpus Christi eta MUG. Kutsu erlijiosoa duten pelikulak dira, eta horretarako apaiz-aritzeagaz zerikusia duten zenbait pertsona ere gonbidatu dituztela iragarri dute.

Erlazionatuak

Sinadura-bilketa hasi dute Leioako Zine Forumak orain arte bezala jarrai dezan

Leioa

Datorren urtean Zine Forumagaz ez jarraitzeko erabakia adierazi dute Zineforum Perseo elkartetik, baldin eta Leioako Udalak ez baditu orain arteko ...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun