Neurria aurreko urriko Udalaren osoko bilkuran onartu zuten EAJ eta PSE-EE eta PPren aldeko botoakaz; EH Bilduk eta Elkarrekin Podemosek aurka bozkatu zuten. Leioako Hiri Antolamenduaren Plan Orokorraren aldaketa puntuala onartzeari esker, Peruri auzoan dagoen Domingotarren komentu zaharreko lurrak birkalifikatu eta eremua urbanizatzea baimendu zuten, bertan eraiki gura duten kiroldegi pribatuaren egitasmoan aurrerapauso erabakigarria emanez.
Bada, aurreko urtarrilaren 15ean, SOS Kurkudi plataformak Bilboko epaitegira eraman du Udalbatzaren erabakia. Plataformako kideek prozesua aurrera eramateko babes nahikoa lortu dutela adierazi dute eta administrazioarekiko auzi-errekurtsoa jarri dute neurriaren aurka.
Azaldu dutenez, erabaki horren bitartez Udalak 27.000 metro koadrorainoko eraikuntza onartu zuen, orain arte, bere balio natural eta paisajistikoagatik lurzoru babestu gisa kalifikatu den eremuan. Halaber, Udalaren erabakiak 2001eko HAPOren araudiaren aurka doala argudiatu dute San Bartolome eta Artatzagane auzo-elkarteek eta Auzotarrok Kultur Elkarteak bultzatu zuten elkarteko kideek.
Udalak erabakia onartu zenean adierazi zuen egitasmo horrek kirol-zerbitzu gehiago eskainiko dizkiela leioaztarrei, 100 lanpostu inguru sortuko dituela eta proiektuak ez duela birkalifikatuko den lursail guztia okupatuko. Gaineratu zuten Udalak orubearen zati handi bat dohainik eskuratuko duela, "ingurumenaren ikuspegitik baliotsuena den 15.400 metro koadro inguruko lursaila", hain zuzen ere. "Horrela, inguruko berdeguneak mantenduko dira eta egungo basoa hedatzeko aukera ere egongo da. Ekimenak, gainera, paisaia-proiektu bat dakar beragaz".
