Hasteko, aurreikusitako eguraldi onak lagunduta, auzoetako txikienak izango dira goizeko protagonistak. 12:30ean futbito txapelketa eta ur-jolasak egingo baitituzte. Ekintzak Txiti okindegiaren ondoan dagoen futbol-zelaian eta latsarriaren inguruan egingo dituzte. Arratsaldean, 16:30etik aurrera, aurpegiak margotzeko eta eskulanak egiteko tailerrak antolatuko dituzte, eta horrez gain, igel-toka eta futbolin txapelketak ere izango dituzte.
Helduei dagokienez, Athletic animatzeko jantzi originalena eta aldarririk ozenena egiten dutenen arteko lehiaketak egingo dituzte, besteak beste. Horregaz batera, ez dira faltako jaia girotzeko musika, traineru zurigorri handia, oroitzapenetako argazkiak jartzeko murala ezta barbakoa eta txokolatada ere. Halaber, peña bien egoitzetara hurbiltzen diren zaleek taldearen kamiseta bereziak ere irabazi ahalko dituzte.
Era berean, Leioako Udalak ere ekintzak antolatuko ditu Errekalde plazan, eta Aketxe plazan pantaila erraldoia ere jarriko dute finala zuzenean jarraitu ahal izateko.
