Aldundiak azpimarratu duenez, Bizkaiak nabarmen egin du aurrera iraupen luzeko zainketen pertsonalizazio-ereduan: lurraldeko zenbait egoitzatan bizikidetza-unitateak zabaltzen ari dira. Gaur egun, 476 plaza daude martxan, dozena bat egoitzatan, eta 900 baino gehiago ezarpen-prozesuan daude, Bizkaiko 14 egoitzatan.
"Bizikidetza-unitateak itxura fisiko eta arkitektonikotik harago doaz. Barruan gertatzen dena da funtsezkoa, alegia, bizitza eta harremanak. Gure zaintza-kontzeptutik urrats bat harago joan behar dugu. Zaintzaren funtsa bera da eraldatu beharrekoa: oinarrizko premiak edo behar instrumentalak bakarrik artatzetik mendekotasuna duten pertsonei lagun egitera igaro behar dugu. Zaintza harremana da, batez ere", azpimarratu du Etxanobek.
Leioako egoitza berriko lanak
Adierazpen horiek egin ditu Ahaldun nagusiak Gizarte Urgazpenerako Foru Erakundeak (GUFE) kudeatzen duen Leioako egoitzara egindako bisitan. Politikariak eraikin horretan egongo diren sei bizikidetza-unitateetatik abiarazitako lehenengo biak bisitatu ditu. Bi bizikidetza-unitate horiek independenteak dira, eta eraikinaren laugarren solairuan daude. Udalerriko auzoen izena daukate, hau da Artaza eta Mendibile. Bakoitzak 20 logela ditu, eta, gehienez, 22 pertsonari arreta emateko gaitasuna du. Era berean, bizikidetza-eremu komunak dituzte, hala nola egoteko gunea eta etxeko sukalde irekia, jantokiarekin eta terrazarekin integratua.
Oraindik obrak amaitu gabe daude, baina solairu guztiak eraldatzeko prozesua amaituta dagoenean, zentroak 132 egoitza-plaza izango dituela aurreratu dute Aldundiko iturriek, sei bizikidetza-unitatetan banatuta; eta, lehenengo solairuan, 25 plazako unitate soziosanitario bat ere izango du. Horrez gain, zentro horren bitartez, Leioak laguntza emango die Uribe eskualdeko gainerako egoitzei, zaintzak pertsonalizatzeko prozesuetan.
Zentroa egokitzeko lanak modu progresiboan garatzen ari dira, obrak egin bitartean egoiliarrak bertan bizi baitira, eta,bitartean, langileak lanean ari dira. Horiek horrela, ahalik eta eragozpen gutxien eragiteko neurri guztiak hartzen ari direla azaldu dute Aldundiko iturriek.
Eraldatze-proiektu horrek 20,8 milioi euro baino gehiagoko kostua izango duela zehaztu dute. Horren zati bat Next Generation EU funtsekin finantzatuko da, Suspertze, Eraldatze eta Erresilientziako Estatu Planaren barruan.
