EAEko Justizia Auzitegi Nagusiak atzera bota du akusatuak epai horren aurka jarritako errekurtsoa eta lau urteko kartzela-zigorra berretsi du. Halaber, eskola-futboleko entrenatzaile gisa bederatzi urteko gaitasungabetzea ere baieztatu du. Martxoan, Bizkaiko Auzitegiak beste sexu-delitu bigatik zigortu zuen entrenatzailea, eta 10 urteko kartzela-zigorra ezarri zion.
Epai horregaz, auzitegiak frogatutzat eman du 2022an gizon horrek entrenamendutik kanpo adingabeagaz topo egin gura izan zuela, haren jarrera zuzentzeko aitzakiagaz, eta sexu-erasoa egin ziola.
Entrenatzailearen defentsak argudiatu zuen biktimaren salaketa "erresuminagatik" izan zela, berak arreta deitu ziolako bere korrika egiteko moduagatik. Hala ere, Bizkaiko Auzitegiak atzera bota zuen argudio hori, adingabearen lekukotzaren koherentzia eta sinesgarritasuna balioetsita.
Auzitegi Nagusiak balorazio hori berretsi du, eta biktimaren deklarazioak akusatuaren errugabetasun-presuntzioa indargabetzeko beharrezko irizpideak betetzen zituela nabarmendu du. Gainera, zentzugabetzat jo du adingabeak egitateak zuzenketa teknikoen bidez asmatzea, korritzeko moduari dagokionez.
