Kanpainaren lehen ekintzetako bat irailaren 20an egingo dute Lamiakon. Bertan, elkarteek informazio-mahaiak jarriko dituzte bizilagunek hezegunearen balioa eta berriztatzeko proposamenak ezagutu ditzaten. Hurrengo hilabeteetan ere jarduera gehiago iragarriko dituzte sare sozialen bidez.
Elkarte sustatzaileek gogorarazi dute ezinbestekoa dela instituzioek hezegunearen bernaturalizazioa bultzatzea, "ez dadin erabat galdu". Horretarako, proposamenen artean padura eta ibai paisaien berreskuratzea, gune horren balio natural eta historikoak ezagutarazteko edukiak eta elementuak sortzea eta inguruko azpiegitura eta eraikinen integrazio estetiko eta paisajistikoa proposatu dituzte.
Informazioa zabaltzeko, hezeguneari buruzko liburuxka bat ere argitaratu dute, eta bertan QR kode baten bidez Leioako Udalak egindako Paisaiaren Ekintza Plana kontsulta daiteke.
Lamiakoko hezegunea Nerbioi ibaiaren itsasadarreko mareen arabera urez betetzen den azken padura eremua da, eta XIX. mendearen amaierako lehortze, industrializazio eta urbanizazio prozesuek asko eraldatu dute gune hori, gaur egungo paisaia ekarri dute. Hala ere, guneak aberastasun eta potentzialtasun handia du oraindik ere: Bizkaiko Foru Aldundiaren inbentarioak 167 hegazti-espezie jaso ditu bertan, horietatik 39 mehatxatuak, eta Eusko Jaurlaritzak Euskadiko Hezeguneen Inbentarioan sartu du.
