Gamonalek txostenean azaltzen duenez, asto-probetan animaliek 700 kiloko harria arrastatu behar izaten dute, atseden eskasagaz eta 20 minutuz, eta horrek "muturreko esfortzua" suposatzen du beraientzako, eta "justifikaziorik gabeko sufrimendua eragiten die".
Horrez gain, minaren, estresaren eta beldurraren zantzu ugari ere identifikatu ditu: burua altxatuta, aurpegi-tentsioak eta saihesteko mugimenduak, adibidez. Txostenak jasotzen du, halaber, probetan zigor fisiko eta psikologikoak erabiltzen direla, hala nola garrasiak, uhalei tirakadak, makil-kolpeak baita astoaren sudurrean kokatzen den zerra izeneko metalezko pieza hortzduna.
Adituak azpimarratu du jarduera hauek ez direla bateragarriak animalien ongizateagaz eta 17/2021 Legeak animaliak izaki sentikortzat jotzen dituela, euren ongizate fisiko zein emozionala errespetatuz.
Gamonalen arabera, nazioarteko erakundeek, hala nola Animalien Osasunaren Munduko Erakundeak (OMSA-OIEk) lan ekidoetan sufrimendua eragiten duten jarduerak baztertzeko gomendioa egiten dute. Txosten horregaz animalien tratu txarren aurkako Leioako elkarteak asto-proben inguruko eztabaida berriro piztu gura du, tradizioaren eta animalien ongizatearen arteko oreka eztabaidagai jarrita.
