San Bartolomeko auzo elkarteak bat egin du auzoko jaietako asto-probak kentzea eskatzen dutenekaz. Azken batzar nagusian landu zuten gaia, eta bozketaren emaitza nahiko erabakigarria izan zen: 18 boto jarduera kentzearen alde, bi mantentzearen alde eta abstentzio bat.
Erabaki horren bidez, auzo elkarteak babesa erakutsi dio azken asteotan Leioan indarra hartu duen eskaerari. Jarduera kentzearen aldekoek uste dute asto-probek animalien ongizatea arriskuan jar dezaketela, eta, horregatik, bestelako aisialdi jarduerakaz ordezkatzea proposatzen dute.
Eztabaidak oihartzun handia izan du azken asteotan. Duela bi aste, herriko animalien aldeko kolektibo batek 3.026 sinadura aurkeztu zituen Leioako Udalean, herri ekimen baten bidez asto-probak egitarautik kentzea eskatzeko. Hala ere, sinadura guztietatik ia 700 ez ziren Leioan erroldatutako herritarrenak, eta beste ehun bat baino gehiago bikoiztuta zeuden. Horren ondorioz, 2.000 inguru izan dira baliozkotutako sinadurak.
Kanpainaren sustatzaileek adierazi izan dute Udalak orain arte defendatu duela jai batzordeek prestatutako egitarauak auzoko bizilagunen «behar eta nahiak» islatzen dituela. San Bartolome auzo elkartearen azken erabakiak, ordea, eztabaidari beste osagai bat gehitu dio; izan ere, auzoko elkarteak berak ere asto-probak kentzearen aldeko jarrera hartu du.
