Ekonomia  Lemoiz 2017-11-09 14:25

Arrain-haztegia egin gura dute Lemoizko zentral nuklearrean

Lemoizko zentral nuklearraren instalazioetan arrain-haztegi bat egin gura du Eusko Jaurlaritzak. Hala jakinarazi zuten atzo Arantxa Tapia Eusko Jaurlaritzako Ekonomiaren Garapen eta Azpiegitura sailburuak eta Rogelio Pozo Azti ikerketa-zentroko zuzendari nagusiak Bilboko Itsas Museoan. Aztik egindako ikerketa baten arabera, posiblea da zentralaren instalazioak birmoldatzea eta bertan ganbak, otarrainxkak, erreboiloak, mihi-arrainak, izokinak eta amuarrainak haztea.

Arrain-haztegia egin gura dute Lemoizko zentral nuklearrean
Lemoizko zentral nuklearra, airetik. | Ikusi handiago | Argazki originala

Arantza Tapiaren arabera, industriaren ikuspuntutik "hondamendi" egoeran dagoen gune bat "berreskuratu eta jarduera ekonomiko ezberdin eta jasangarri bat jarriko dugu martxan", lanpostuak eta aberastasuna sortzeko aukeragaz.

Bertan askotariko espezieak haztea teknikoki zein teknikoki bideragarri ote den aztertzeko ikerketa bat egin du Aztik, eta benetan "egingarria" eta "bideragarria" dela egiaztatu dute. Hartara, instalazio horiek akuikulturan erabiltzeko birmoldatzea proposatu dute.

Aztiko ordezkariak azaldu duenez, azpiegiturak ur hartuneak ditu eta bertan enpresa bat baino gehiago kokatzeko adina espazio du, merkatuan eskaera handia duten espezieak ekoizteko. Gainera, poligonoaren garapenerako eredurik interesgarriena mistoa da, akuikulturaren ekoizpena eta berrikuntza teknologiko sektore-anitzekoa konbinatuko lituzkeena.

Oraindino ez dago proiektu zehatzik adostuta; hala ere, Rogelio Pozok aurreratu du badaudela hainbat inbertsiogile interesatuta horretan, EAEkoak zein Europakoak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa