Lemoizko Udalak adierazi duenez, informazio-gune berria "herritarrak hondakinak bereiztearen garrantziaz kontzientziatzeko" helburuagaz sortuko da, modu horretan, udalerriko bizilagunek sastarrak edukiontzi egokietan uzten ikasteko. Hala, hondakinen karakterizazio-jardueran parte hartu ahal izango dute herritarrek, eta, ekimen horren bidez, errefusa gisa jasotzen denaren zein zati birzikla daitekeen aztertu gura dute antolatzaileek. Informazio-gunea zabalik egongo da zapatu honetan, ekainaren 3an, goizeko 10:30etik 13:30era Armintzako Portuan.
Hondakinen karakterizazio-jarduerarako, bertan izango diren ingurune-hezitzaileek karakterizatu beharreko lagina hartu ondoren, poltsa guztiak irekiko dituzte, eta edukia sei koloretako edukiontzietan sailkatuko dute. Hala, lortutako datuak, momentuan bertan erakutsiko dituzte.
Ekintza hau, Uribe Kostako Zerbitzu Mankomunitateak antolatu du Aste Berdearen harira, eta mankomunitatea osatzen duten beste udalerrietan ere ospatuko da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!