Barikuan, azaroaren 24an, amaitu zen “Lemoiz y sus gentes" lehiaketako hiru argazkirik onenak bozkatzeko epea. Helburu nagusia da ilustratzea herritarren artean doan banatuko den Lemoiz 2023 egutegia. Lehiaketako hiru irabazleei tokiko produktuen saski bat emango zaie sari gisa.
Egutegia osatzen duten 12 argazkien artean, herritarrek euren bozkakaz erabaki dute hiru irabazleak honako hauek izatea: Mikel Agirre - Ilundia Atxabaisen (77 bozka); Elisabeth Arosa - Lerro arteko mugimendua (75 bozka) eta Noemi Labeaga Chamorro_Irakaskuntza (36 bozka).
Guztira 330 bozka zenbatu dira azaroaren 17tik barikuko 00:00ak arte udal webgunearen galdetegiaren bidez eta Armintzako Kultur Etxean jarritako hautetsontzian zabalik egon den bozketan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
