Ekologistak Martxanen esanetan, akuikultura intentsiboko egitasmoak "mehatxu larria" ekar diezaioke inguruko itsas ekosistemari. Izan ere, proiektuak urtean 3.000 tona mihi-arrain haztea aurreikusten duela ohartarazi dute, eta halako jarduerek elikagai-kopuru handiak eta produktu kimikoak erabiltzea ekar dezaketela nabarmendu dute, tartean antibiotikoak, algizidak, desinfektatzaileak eta intsektizidak.
Taldeak beste kezka bat ere plazaratu du: ekoizpena eta garraioa bermatzeko beharrezkoa izango litzatekeen kamioi-kopurua. Ekologistak Martxanen arabera, horrek ibilgailu astunen trafikoa nabarmen handitu dezake Lemoizko zentralerako errepidean, airearen kutsadura areagotuz. Era berean, zalantzan jarri dute egungo bideak —noranzko bakoitzeko errei bakarra duena— horrelako jarduerarako gaitasunik duen, eta beldur dira errepidea zabaltzeko obrek ingurune naturalean kalte gehiago eragin ditzaketen.
Horren aurrean, talde ekologistak eskatu du ez dadila euro publiko gehiago bideratu zentral nuklear zaharraren berrerabilpen-proiektu horretara. Gogorarazi dutenez, dagoeneko 2,5 milioi euro inbertitu dira dikearen konponketan, eta, haien iritziz, erakundeek beste norabide bat hartu beharko lukete: zentralaren eta haren azpiegitura osagarrien desegitea planifikatzea.
Ekologistak Martxanek Bizkaiko Foru Aldundiari eta Eusko Jaurlaritzari eskatu die Basordas kala eta zentralaren ingurune osoa benetan berreskuratzeko eta birnaturalizatzeko proiektua idazteko. Horretarako, espezie inbaditzaileak —bereziki panpa-belarra— eta eukalipto-sailak ordezkatzea beharrezkotzat jo dute. Gainera, proiektu horren kostua Iberdrolak bere gain hartzea galdegin dute, enpresak Lemoizko zentralaren eraikuntzatik eta ondorengo kalte-ordainetatik etekina atera zuela argudiatuta.
