Udako jaiak 2017

Ondo pasatzeko hamaika aukera egongo da Plentzian egunotan

Sardinak jateko aukera egongo da jaietan.

Udan bete-betean sartuta gaudela, denboraz, konpainiaz eta eguraldiaz gozatzeko aukerarik ez da falta Plentzian. Hori gutxi ez balitz, beste horrenbeste jai antolatuta daude garaiotan, bertokoen zein etorritako guztien gozamenerako. Sankristobalak atzean utzita, karmenak eta madalenak ospatzeko ordua heldu da: uztailaren 15etik 16ra, eta hilaren 20tik 22ra, hurrenez hurren.

Hala, egunotan hiribilduan egongo direnek askotariko jarduerez gozatzeko tartea izango dute, berbarako, txapelketa gastronomikoak, sardina-janak, zezensuzkoak, kontzertuak, umeentzako jolasak eta erromeriak. Horiez gainera, plentziarrek hitzordu garrantzitsua izango dute uztailaren 16an, Karmengo Ama Birjinaren omenezko itsas prozesioa egingo dute ibaian gora.

Bertan parte hartu gura duten denek ontziak erregistratu beharko dituzte Plentziako Turismo Bulegoan, uztailaren 7a baino lehenago. Agiri hauek aurkeztu beharko dituzte: izen-ematearen orria (udal-webgunean deskarga daiteke), nabigazio-ziurtagiria eta erantzukizun zibilaren aseguruaren ordainketa eguneratua. Udalak jakinarazi duenez, 40 ontzi baimenduko dituzte, gehienez; gainontzekoek ezin izango dute parte hartu.

Karmenak

Uztailak 15, zapatua

  • 10:00    Marmitako-lehiaketan izen-ematea.
  • 11:00    Arrantza-lehiaketa; arrainak hil barik, uretara itzuliko dira harrapatu ostean.
  • 13:30    Marmitako-lehiaketaren lapikoak aurkeztea.
  • 14:30    Sarien banaketa.
  • 22:00    Zezensuzkoa.
  • 23:00    Erromeria.

Uztailak 16, domeka

  • 10:00    Ohorezko meza.
  • 10:30    Karmengo Ama Birjinaren omenezko itsas prozesioa.
  • 12:00    Ohorezko agurra eta dantzak.
  • 13:00    Fanfarria, Kuklux taldea.
  • 19:00    Itsas jolasak (ordutegia alda liteke, mareen arabera).
  • 20:00    Sardina-jana.
  • 22:00    Zezensuzkoa

Madalenak

Uztailak 20, eguena

  • 22:00    Kontzertua, Half-Chicken Barriles taldeagaz.

Uztailak 21, barikua

  • 18:00    Suziria botatzea eta, ostean, umeentzako jolas-parkea, Ontziola plazan.
  • 20:00    Kantu-jira Plentzia Kantagunegaz, Eleiz plazatik hasita.
  • 22:00    Zezensuzkoa.
  • 22:30    Kontzertua, Butron Delta Crazy Wheels Band taldeagaz.

Uztailak 22, zapatua

  • 11:00-20:00    Madalenako Artisautza- eta Diseinu-Azoka.
  • 11:30    Elkarretaratzea eta Udalbatzaren igoera, elizara.
  • 12:00    Meza nagusia; eta aurreskua, Eleiz plazan.
  • 13:00    Musika-bandaren kontzertua, Ontziola plazan.
  • 14:00    Koktel-lehiaketa, fanfarreagaz eta trikitilariakaz.
  • 16:20    Plentziako Badia I. Itsas Zeharkaldia.
  • 18:00    Eskupilota-partidak, Labasturen.
  • 19:00-21:30    Oihan Vega dj-a, Ontziola plazan.
  • 22:00    Zezensuzkoa.
  • 22:30    Kontzertua, Lehian taldeagaz.
Erlazionatuak

Uribe Kosta jaietan, 2017

Uribe Kosta

Hona hemen 2017ko udan eskualdean izango ditugun jai guztien egitarauak, herriz herri eta auzoz auzo. Adi! Aurten ere jarraipen bereziak egingo d...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun