Politika  Plentzia 2019-05-13 13:52

"Plentzia eraldatzen jarraitu" gura du EH Bilduk

Erredakzioa

Amaitzear dagoen legegintzaldian egindako lanari jarraipena emateko asmoz, udalaren "eraldaketa sendotu" gura du Plentziako EH Bilduk, udal-hauteskundeetarako programaren aurkezpenean adierazi dutenez. "Ikusi da Udaletxea herritarrei zabaltzea, zaila izan arren, lor daitekeela", dio koalizioak.

"Plentzia eraldatzen jarraitu" gura du EH Bilduk
© PLENTZIAKO EH BILDU | Ikusi handiago | Argazki originala

EH Bilduren Herri Programaren puntu nagusien artean, Etxebizitza Zinegotzigoa sortzea aipa daiteke. Prezio altuen erruz gazteek herritik alde egin behar izaten dutela eta, urte osoan bertan bizi ahal izateko politikak bultzatzeko asmoa du koalizio abertzaleak. Besteak beste, egungo etxebizitzen okupazio-maila ikertu gura dute, baita ere etxebizitza hutsen alokairua sustatu, eta etxebizitza turistikoen erabilera arautzeko ordenantza bultzatu.

Hirigintzari dagokionez, oinezkoei lehentasuna eman gura die EH Bilduk. Alde Zaharra eta Erribera kalea oinezkoentzat egokitzeko aukeraz eztabaida-mahaia sortzeko proposamena jasota daukate euren programan, edozein herritarrek parte hartzeko modukoa baina bereziki dendari eta tabernarien ahotsa entzun ahal izateko.

Bestalde, udal-politiketan agenda feminista txertatzea eta herritarrek udal-erabakietan parte hartu ahal izateko mekanismoak garatzea ere lehentasunen artean ditu Plentziako EH Bilduk. "Udalaren eta herritarren
elkarlana landuz, sekulako sinergiak lortu ditugu", David Crestelo zerrendaburu eta gaurko alkatearen esanetan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa