EH Bilduko iturriek jakinarazi zutenez, maiatzaren 23an jaso zuten Udalean (artean David Crestelo alkatea zela) hainbat gurasoren idazki bat, pediatra-faltagatik protestatuz. Koalizio abertzalearen esanetan, maiatzaren 24an alkateak Osakidetzako eskualdeko ESIren zuzendariari, Mari Luz Marquezi, bidali zion gurasoengandik jasotako mezua. Handik hilabetera, ekainaren 17an, Marquezek erantzun zuen Osakidetza eta Jaurlaritza arazoa konpontzeko baliabideak bilatzen ari zirela.
Uztailaren 10ean, EH Bilduk, ordurako oposizioan, Elixabete Uribarri EAJko alkateari eskatu zion Udalak Osakidetzari galde ziezaiola egoera bideratzeko pausoez eta pediatria-zerbitzua berriro izateko aurreikusitako epeez. Abuztuaren 2an, alkateak idatzi bat bidali zien maiatzean kexatu ziren gurasoei, Osakidetzak Udalari esandakoa jakinaraziz. Hau da, arazoa konpontzeko lanean zebiltzala, ostera ere pediatra izateko data zehatzik finkatu barik.
Irailean, aldiz, Legebiltzarrera jotzea erabaki zuen Plentziako EH Bilduk, honako galdera bikoitza egiteko: Osakidetza zer egiten dabilen eta zerbitzua noiz itzuliko den. Osasun Sailburuak joan den urriaren 2an erantzun zion koalizio abertzaleari, idazki bidez. Horrek azaltzen duenez, maiatzera arte jardunean ibili zen pediatra titularrak erretiroa hartu zuen, lanpostu hori "hutsik" utzita. Hala, lanpostua "arauzko eran" betetzeko, barne-mugikortasuneko prozesu baten deialdia egin behar dela azaldu du Osasun Sailburuak; "Prozedura horrek emaitzarik izan ezean, hurrengo urratsak egingo lirateke Osakidetzako langileen ordezkariekin itundutako mekanismoen arabera. Barne-mugikortasuneko prozedura 2019ko urrian amaitzekoa da". Era berean, azaldu du lanpostuaren titularrak erretiroaren aurreko oporrak hartu zituela eta ordutik "profesional gaituak" ibili direla lanean eta "arreta bermatuta egon dela" pediatria-zerbitzuan".
EH Bilduk jakinarazi duenaren arabera, lanpostua erantzuna jaso aurreko egunean bete zuten pediatriako lanpostua: "Izugarri pozten gaitu, Plentziako familiak eta umeak dagokien zerbitzua berriz izatea".
