Uztailaren erdialdean jarri zuen martxan Udalak enpresa txiki-ertainentzako laguntza-deialdi hori, COVID-19ak eragindako krisiaren ondoren Plentziako ekonomia suspertzeko asmoz. "Laguntzak ez dira inoiz nahikoak izango Plentziako merkataritza- eta turismo-sektoreetan pandemiaren ondorioak arintzeko; hala ere, Udalak ezinbestekotzat jotzen du enpresei laguntza eskaintzea, kontuan hartuta 4.400 biztanleko udalerri baten aurrekontu-ahalmena. Beraien ondoan egongo gara aurrerantzean ere", gogoratu du Elixabete Uribarri Plentziako alkateak.
Bestalde, Iñaki Saenz de la Fuente Ekonomia Garapen, Turismo, Merkataritza, Enplegu, Landa Ingurune eta Euskarako zinegotziak azpimarratu duenez, "Udalak 150.000 euro jarri ditu Plentziako enpresa-sarearen esku, merkataritza establezimenduei laguntzak emateko, martxotik ekainera bitarteko aldiari aurre egiteko. Hala ere, COVID-19aren eraginak udalerriko ekonomian eta enpresetan oraindik ere presente daude; beraz, gainerako 100.000 euroak datozen hilabeteetan Plentziako turismoari, merkataritzari eta zerbitzuei laguntza gehiago eskaintzeko deialdi berriak egin ahal izango ditugunaren bermea dira". Uda itxaropentsu hasi zen Plentziako turismoaren eta merkataritzaren sektorearentzat; hala ere, agerraldiek eta udazkeneko denboraldiaren hasierak eragina izan dezakete enpresen ekonomian, eta, hori dela eta, Udalak ez du baztertzen laguntza horien bigarren deialdia egitea, Covid-19ak udazken-negu honetako ekonomian eragingo dituen ondorioak arintzeko.
150.000 euroko zenbateko hori oan den ekainaren 3an COVID-19aren ondorioen aurrean udalerria suspertzeko plana abian jartzeko Udalak onartu zuen 308.000 euroko partidaren zati bat da. Halaber, Saenz de la Fuentek Plentzia Garatzen programa balioan jarri du. Aholkularitza- eta laguntza-zerbitzu hori apirilean jarri zen abian, eta udalerriko enpresei laguntza zuzena eta espezializatua ematen jarraitzen du, erakunde publikoek koronabirusaren ondorioak direla eta abian jarritako laguntzen eta diru-laguntzen onuradun izan daitezen. Orain arte, 30 enpresa baino gehiagok erabili dute zerbitzu hori.
