Danontzat gaztetxeko kideek gutun baten bidez azaldu gura izan dute zergatik jarri zituzten kartelak "Orain Plentzia" kanpainako poltsa moduko euskarrietan. Horien arabera, ez zen tokiko merkatarien aurkako eraso bat izan, eta "baten batek horrela ulertu badu, barkamena eskatu nahi diogu", adierazi dute. Udalak ekintza hori kritikatu zuen, "herritar guztiekiko iraina eta errespetu falta" zela aurpegiratuta.
Gune autogestionatuko kideek sare sozialetatik zabaldutako gutunean adierazi dutenez, Udalak milaka euro gastatu ditu "zalantzazko eragina" izango duen ekintza batean, eta gomendatu diote merkatariei laguntzeko hobeagoa izango litzatekeela multinazionalez betetako merkataritza-gune gehiago ez sortzea. "Guk jarritako bi kartelak ez dira Plentziako komertzioak hiltzearen erantzule, bai ordea, EAJk eskualde osoan ezarritako merkataritza-guneak", azpimarratu dute.
