Plentziarra azkarrena izan zen atzo, ekainak 19, Pasaiako uretan lehiatu zen Kepa Deun Arrantzaleen Kofradiako XXII. Ikurriñan. Garaipen horregaz, Arkotekoek KAE 1 ligako lidergoagaz hasi dute 2022ko denboraldia. Hurrengo estropada aste-akabu honetan izango da Zumaian.
Arkoteko arraunlariek lehia estu baten ondoren eskuratu zuten garaipena atzo; izan ere, segundo bakarra eta 56 segundo-ehuneko aldea atera zieten Sanpedrotarrako etxeko traineruei. Horien atzetik sailkatu ziren Hondarribia B, San Juan, Zarautz, Deusto, Castro Marinera, Camargo, Zumaia, Orio B eta Busturialdea.
KAE 1eko bigarren estropada puntuagarria datorren domekarako, ekainaren 26rako, programatuta dagoen Zumaiako XXXVII. Ikurriña izango da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
