"Gutxika, euskal mitologiako pertsonaiak joan dira sartzen, eta aurten ere dantza eta pertsonaia berriren bat egongo da", aurreratu du antzezlanaren antolakuntza-lanen koordinazioan dabilen Mercedes Etxegaraik. Hala ere, argitu du antzezlanak aurreko urteetako ildo bera jarraituko duela. Gainera, aurten ez dute aurreko bi urteetan COVID-19ak eragin zituen buruhausteak izango; izan ere, 2021ean, lehen aldiz frontoian egin behar izan zuten antzezlana, edukiera kontrolatzeko.
Urtero, irailean hasten dituzte prestakuntza-lanak. Horietan dabiltzan kide guztiak boluntarioak direla azpimarratu du Etxegaraik: “Zortzi pertsonako talde bat gabiltza horretan, eta bakoitza ikuskizunaren atal batez arduratzen da: jantziak, dantzariak, hornitzaileak...”. Dioenez, urtez urte aktoreak aldatzen doaz, “adinaren arabera, nagusiak direnean berriak sartzen saiatzen gara, nahiz eta herri txikia izanik hautagai askorik ez izan”.
Koordinatzaileak azpimarratu duenez, “herrian oso errotuta dagoen urteroko ohitura da, jende askok parte hartzen du eta herri guztia etortzen da ikustera. Kanpotik datorren jendearentzako ere berezia izan daiteke, beste herrietan normalean ez delako horrelakorik egiten; horregatik ere da hain berezia guretzat”.
Anbotoko Mari, Basajaun, artzainak, naturaren lau elementuak (ura, sua, haizea eta lurra), jentilak, sorginak, lamiak... Askotariko pertsonaiaz osatutako antzezlana abenduaren 24an bueltatuko da. 18:45etik aurrera, zubitik atera eta alde zaharreko kaleetan gora egingo dute Eliz plazan Olentzero eta Mari Domingiren etorrera handikiro ospatzeko.