Plentziako EAJ-ko alderdikideek Elixabete Uribarri egungo alkatea berretsi dute maiatzaren 28an egingo diren udal-hauteskundeetarako hautagaia izateko. Abokatua lanbidez, ibilbide luzea egin du politikan, eta alderdi jeltzaleak orain arteko lana onetsi du, eta erabaki du bera izan dadila hautagaia hurrengo lau urteetako udal-kudeaketa burutzeko.
Egun, Plentziako EAJ egiten ari den barne prozesutik ateratako lantaldearen laguntza izango du hurrengo maiatzaren 28an egingo diren udal-hauteskundeari aurre egiteko. Zeregin horretan udalerriko belaunaldi ezberdinetako pertsonak lanean ari direla azaldu dute alderdiko iturriek.
Azpimarratu dutenez, amaitzear dagoen legealdia erronkaz beteta egon da, eta, pandemiak nabarmen baldintzatu du agintaldia. Zentzu horretan, Uribarrik udal-kudeaketaren buru egindako lana aztertu ondoren, Plentziako EAJ-k konfiantza eman dio hurrengo lau urteetan "Plentziak behar duen aldaketa lideratzen jarrai dezan". Zentzu horretan, Plentziarentzako "proiektu serio eta errealista" planteatuko dutela adierazi dute, "oinak lur gainean sendo dituenak, baloredun proiektuak, hurbiltasuna, ezaugarri izango dutenak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
