Lehen deialdia urriaren 19an izango da, Arriolagane sagardotegian, 17:30ean. Bilera informatibo horretan, gobernu-taldeak Saratxaga auzoko sarbidea egokitzeko egitasmoa azalduko du. Aitor Garagarza Plentziako alkateak iragarri duenez, beraien asmoa da Aldundiaren errepide hori urbanizatzea eta eskuineko aldean espaloia egitea. Aldez aurretik, alkateak adierazi du proiektua gauzatzeko desjabetuak izango diren herritarrakaz ere batuko direla.
Metro-inguruko eremua berrantolatzeko proiektua azaltzeko bigarren hitzordua urriaren 23an izango da, 18:30ean, Plentziako eskolan. Zubia, Txipio auzoko sarbidea eta metro-geltokia dauden eremua egokitzeko proiektuari alegazioak aurkezteko epea zabalik dago oraindik, eta gobernu-taldeak horren inguruko informazio zehatza helarazteko baliatu gura du aurkezpena.
Azkenik, Plentziak duen aparkaleku-arazoari irtenbide bat bilatzeko kontsulta egingo dute urriaren 26an, 18:30ean, Goñi Portalen. Garagazak adierazi du OTA bezalako sistema bat jartzea baztertu dutela, herrian oso aparkaleku gutxi dagoelako. "Erroldatuentzako, uda pasatzera datozenentzako eta gainontzekoentzako sistema izan daiteke, baina oraindik zehazteke dago eta baliteke hurrengo udan oraindino prest ez izatea. Horretarako, Deba, Mundaka edo Zumaia bezalako sistemak ari gara aztertzen".
