Gontzal Hermosilla Sopelako alkatearen urteko soldata 6.800 euro (%15,43) eta Leire Basauri alkateordearena 6.000 euro (%12,74) igotzea erabaki zuen EAJk, PSEren aldeko botoakaz, Udal Gobernua osatu ostean egindako lehendabiziko osoko bilkuran. Bada, "konfiantzazko aholkularia kenduta 40.000 euro aurreztu" dituztela erantzun die igoera kritikatu zuten alderdi politikoei udal agintari berriak. "10.000 euro gehiago aurreztuko ditugu udalkideen ordainsariak doitzeko neurrietan eta diru hori dena enplegua sustatzeko neurrietara bideratuko dugu", gaineratu du Hermosillak.
Saioa Villanueva EH Bilduko alkateak 44.181 euro irabazten zituen urtean, koalizio abertzaleak goi-karguen laurden bateko beherapena onartu ostean. EAJko Gontzal Hermosillak 51.000 euro gordin irabaziko ditu urtean, eta Leire Basauri alkateordeak 48.000 euro. "Hala ere, Sopela bezalako udalerri batentzat, Eudelek gomendatutako gehiengoa baino %24 txikiagoak dira soldatok", udal agintari sopeloztarrak adierazi duenez.
Uztailaren 9ko osoko bilkuran dietak bere horretan uztea erabaki zuen Sopelako Udalbatzak. Hala, 135 euro jasoko ditu informazio-batzorde bakoitzera doan ordezkari politikoak; eta 180 euro osoko bilkura bakoitzera doanak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.