Lehenengo aldiz, Sopelan egitekoa zen aste-akabu honetan Euskal SUP Surfing Txapelketa; baina ez da hala izango. Euskal Herriko Surf Federazioa (EHSF) antolatzaileak adierazi duenez, aste-akabu honetarako "itsasoaren eguraldi-iragarpena arretaz aztertu ondoren", txapelketa "bertan behera utzi" dute. Halere, gogorarazi dutenez, datorren hilean, azaroaren 14an eta 15ean, Euskal Herriko Txapelketa egingo dute Bakion. Orduan, arraun-surflariek izango dute uretara irteteko aukera.
Euskal SUP Surfing Txapelketa zapatuan ala domekan egitekoa zen, egun bietako batean, itsasoaren egoeraren arabera aukeratu behar baitzuten zapatuan ala domekan egin, Arriatera hondartzan.
Txapelketak maila bakarra izan beharra zuen: Open maila. Beraz, emakumeak eta gizonak aldi berean lehiatzekoak ziren. Besteak beste honako surflariek hartu behar zuten parte: Ibon Rodriguez Sacedo, Javier Corcuera, Oihan Aizpuru Aldatz, Jose Mari Ayestaran eta Iñaki Navascues.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
