Erakusketa egin ala ez udal alderdietako bozeramaile denen artean erabakitzea gura du Sopelako Udalak

Zigor Merodio preso politiko bilbotarraren "Aldharrikatuz" eskultura-erakusketa "zentsuratzea" egotzi zion Sopelako EH Bilduk EAJ eta PSE-EEren Udal Gobernuari. Tokiko agintariek erantzutakoaren arabera, txosten teknikoa eskatu du Alkatetzak. Erakusketa egin ala ez udal alderdietako bozeramaile denen artean erabakitzea gura du; horregatik, txostena dagoenean eurei pasatuko diete, baita erakusketaren aurkezpen-txostena ere. Halaber, Alkatetzak daukan informazioaren arabera, "data ez zegoen erreserbatuta eta aurreko korporazioak nahiago zuen hurrengo korporazioak erabakitzea". Argi utzi gura izan dute: "Alkatetzak gai honen berri izan duenean, txostena eskatu du".