Joan den astean, Sopelako itsas hondoa aztertzen ibili zen "Meridian" ontzi ingelesa; Nautilus kanpainaren barruan, Virginia estatutik (AEB) itsasertz sopeloztarrera ekarri gura dute, itsasoaren azpitik, 8.000 kilometroko luzerako zuntz optikoko kablea, 2017an. Gontzal Hermosilla EAJko alkateak adierazi duenez, "argi dago Sopela eta Bizkaiko kostaldea oro har, nazioarteko komunikazioari erreparatuz, gune estrategikoa dela eta hori albiste ona da guretzat".
Udal agintari sopeloztarraren arabera, "adituen esanetan, itsaso azpiko kableak, mundua konektatuko duten instalazioak izango dira. Itsas azpiko zuntza, ahots eta datu trafikoa fidagarritasun eta segurtasun handiagoz bidaltzeko baliagarria izango omen da, konexio bizkorragoak ahalbidetuz".
Prospekzio-lanek Espainiako Kanpo Arazoetako eta Lankidetza Ministerioaren oniritzia daukate; erakunde horrek eman zion "kanpaina zientifikoa" aurrera eroan ahal izateko baimena Erresuma Batuaren Madrilgo Enbaxadari. Hala, "Meridian" itsasontzia apirilaren 10etik 15era ibili da Sopelako kostaldean; daborduko alde egin du Uribe Kostako uretatik.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
