Sopelan "beste eredu polizial bat" aldarrikatzeko bildu dira

Dozenaka sopeloztarrek parte hartu zuten kontzentrazioan.

Zubigane kaleko supermerkatuan lapurtzea egotzita, hiru gizon atxilotu zituen Sopelako Udaltzaingoak, martitzenean; lekukoek, ostera, Udalak zabaldutako bertsioa "gezurrez josita" dagoela uste dute. Euren ustez, hiru lagunak "bortizki" atxilotu zituzten udaltzainek. Hori salatzeko, dozenaka lagunek egin zuten kontzentrazioa atzo, Udaltzaingoaren komisariaren aurrean.

Sopelan "beste eredu polizial bat" eskatu zuten atzo bildutako herritarrek; izan ere, kontzentrazioaren ostean irakurritako adierazpenean aipatu zutenez, "urteak dira Udaltzaingoaren aldetik hainbat eraso jasaten ditugula Sopelako herritarrok". Azaldu dutenez, "herriko sarrera eta irteeretan ia egunero egoten dira kontrolak, horietako batzuk buru-berokiagaz eta armak eskuan; herriko gazteen eta etorkinen kontrako jazarpena, herritarrakaz erakusten duten jarrera desafiatzaile eta zakarra... ohikoak dira". Sopela bezalako 13.000 biztanle inguruko herri batean bizilagunon segurtasuna eta ongizatea bermatzeko beharko lukeen polizia bat izatetik "urrun" dago Sopelako Udaltzaingoa, deitzaileen ustez, "eskualde osoan delinkuentzia-tasa baxuena duen herria garenean, gainera".

"Herrian txertatutako polizia gura dugu: hurbila, laguntzeko prest dagoena, arduratu egiten dena, elkarlanean aritzen dena, pedagogikoa dena; eta, hortaz, zirika, errepresioa eta larderia alboratzen dituena. Horretan jarraituko dugu lanean", azaldu dutenez. Hala, datozen asteotan Sopelan gura eta "behar" duten polizia-ereduaren gaineko eztabaida zabaltzeko asmoa azaldu dute. Sopeloztarrei prozesu horretan parte hartzeko dei egin diete, "Sopelan gura eta behar dugun polizia-eredua denon artean eraiki dezagun".

Erlazionatuak

Sopelako udaltzainen jokabidea salatuko dute gaur arrastian

Sopela

Sopelako Udaltzaingoak hiru gizon atxilotu zituen herenegun, martxoaren 21ean, supermerkatu batean lapurreta egitea egotzita. Besteak beste, "autor...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun